મારી આંતરડી ("ખેડૂત")
છસો આપી કલાકના, ખેતર મેં ખેડાવ્યું;(૨)
પંદરસોની થેલી એવું સારું બિયારણ લાવ્યો.
બારસો લેખે ખાતર લીધું(પ્રતિ થેલી), આવી સો ની દવા;(૧ નંગ)
પેરવાના એ પૈસા બચાવવા, પુંખ્યા છૂટા ઘઉં.
પોષ માસની પાછલી રાતે, વાળુ એકલો પાણ(પાણી);
ગાત્ર થીજાવતી ઠંડી સામે એકલો લડુ જંગ.
ડૂંડા જોઈ હરખાયો, તો ઉધઈ જોઈ અકળાયો;
મૂડી મારી ખર્ચી ને, હું ઘણીવાર પછતાયો.
લણણી ટાણે દાડિયા કીધા, એકલે પાર ના આવ્યો;
દાડી દીધી દોડસો રૂપિયા(પ્રતિ વ્યક્તિ), દસ બોલાવ્યા દસ દિન.
થ્રેશરના તે હજાર કીધા, કલાકે ચૂકવો "ચાંદ";
સપના કાજે સાહસ કીધા, લીધા વ્યાજે દામ.
કૃપા થયી કરુણાનિધિ, લીધો મબલખ પાક;
ધાન કેરો ઢગલા જોઈ, બેઠા હેઠા પ્રાણ.
દીકરી બોલી, " દેવું દઇ દો!", દીકરે ઝાઝી અભિલાષ;
પત્ની કે, "કરિયાવર લઈ દો", મનમાં કરું અભિમાન.
બીજા દિ મંડી એ ચાલ્યો, શહેરની પકડી વાટ;
બજારમાં મૂકી ધાન, મોલની જોવું રાહ.
કણબીનો દીકરો કાળજું વેચે, શેઠિયાને નહિ ભાન;
પંદર રૂપિયે કિલો દીધા, મોલે થયો બેઈમાન.
મફતના ભાવે મોલ કીધા, બજારે લૂંટી લાજ;
ખરચ કરતાં કરજ વધ્યું, કોણે કરું ફરિયાદ.
શું "MRP" જેવું ધાનમાં "MSP" આવશે ખરું?
શું કણબી હોવું ગુનો છે, તો ક્યારે વળશે કળ?
સંતાનોના સપના, પત્નીના અભરખા;
કોણ ઠારશે આ "કકળતી આંતરડી"?
• ચંદ્રસિંહ જી પરમાર "સરગુડી" (દહેગામ, ગાંધીનગર)
ટિપ્પણીઓ